🌹 श्री गुरू स्वामी समर्थ 🌹 ! देऊळ बंद ! 🌹 स्वामींचा महिमा सांगणारा चित्रपट

 🌹 श्री गुरू स्वामी समर्थ 🌹 ! देऊळ बंद ! 🌹 स्वामींचा महिमा सांगणारा चित्रपट

प्रवीण तरडे दिग्दर्शित ‘देऊळ बंद’ हा चित्रपट २०१५ साली प्रदर्शित झाला होता. स्वामींचा महिमा सांगणारा हा चित्रपट आजही लोक तेवढ्याच आवडीने पाहतात. खरं तर स्वामींवर एक डॉक्युमेंटरी बनवायची होती पण कथानकच एवढे आवडले की त्यावर थेट चित्रपटच बनवला जावा असा निर्णय घेण्यात आला. देवाला न मानणाऱ्या प्रविणला चित्रपटाची ही कथा अवघ्या पाचच मिनिटांत सुचली होती. हा इंटरेस्टिंग किस्सा नेमका काय आहे ते जाणून घेऊयात. प्रवीण तरडे यांचे आई वडील दोघेही विठ्ठलाचे भक्त. पण प्रवीण तरडे स्वतः देवाला एवढे मानत नव्हते. दर दोन दिवसांनी उपवास, देवाची पूजा त्यांच्याकडून घडत असे एवढीच त्यांची एक भावना होती. त्याकाळात प्रवीण तरडे यांचा स्ट्रगल सुरूच होता. तेव्हा त्यांना स्वामींवर एक डॉक्युमेंटरी बनवण्याची संधी चालून आली. मुरलीधर मोहोळ यांच्या कार्यक्रमाचे मॅनेजमेंट प्रवीण तरडे पाहत असत. निलेश कोंढाळकर हा त्यांचा कार्यकर्ता त्याने प्रविणला कैलास वाणी यांना डॉक्युमेंटरी बनवायची आणि त्यांना जाऊन भेटा असे सांगितले. एक संधी म्हणून प्रवीण तरडे भेटायला गेले.तिथे गेल्यानंतर कैलास वाणी यांच्या मागे भलामोठा स्वामींचा फोटो होता. त्याआधी स्वामी कोण हे प्रवीण तरडे यांना अजिबातच माहीत नव्हते. ते म्हणाले की मला समर्थांवर एक डॉक्युमेंटरी बनवायची. प्रवीण यावर म्हणतात की, ” मला वाटलं समर्थ म्हणजे समर्थ रामदास असं कोणीतरी असेल.पण हा फोटो दुसऱ्याच कोणाचा तरी आहे हा रामदास स्वामींचा नाही दिसत. ते मला म्हणाले तुम्ही ओळखतच असाल स्वामींना?. त्यावर प्रवीण तरडे फोटो दाखवून हात जोडत म्हणाले ‘हे काय’. त्यांनी मला ५ लाखांचं बजेट असल्याचं सांगितलं. एवढ्याश्या बजेटमध्ये काहीच होणार नाही असा मनात विचार केल्यानंतरही प्रवीण तरडे यांनी ‘करू’ असे आश्वासन दिले. ते मला म्हणाले उद्या आपल्याला नाशिकला जायचंय, स्टोरी तयार करून ठेवा. एवढूशा डॉक्युमेंटरीसाठी काय स्टोरी लिहायची असे म्हणून प्रवीण तरडे त्या रात्री निवांत झोपी गेले. पण सकाळीच त्या माणसाचा फोन आला आणि लगेचच नाशिकला निघायचंय, पिंपरी चिंचवड मध्ये एका मित्राला घेऊ आणि थेट नाशिकला जाऊ असे त्यांनी सांगितले. त्यांचा फोन येईल याचा मी विचारच केला नव्हता. अंघोळ न करताच तोंड धुतलं आणि त्यांच्याकडे गेलो तर तिथे आप्पा बारणे आमची वाट बघत बसले होते. लगेचच त्यांचा ताफा नाशिकला निघाला. आता या मधल्या वेळेत मी काहीतरी कथानक शोधून काढेन, माझ्याकडे भरपूर वेळ आहे असे म्हणत मी प्रवासाला निघालो. मला गाडीत बसलं की उलट्या होतात.जसा हा त्रास सुरू झाला त्यातच मी झोपून गेलो ते थेट नाशिक आल्यावरच उठलो. दरम्यान स्टोरी अजूनही तयार झालेली नव्हती. पण दर्शनाला भरपूर मोठी रांग असते या वेळात आपण स्टोरी तयार करू असा विचार केला. पण तेवढ्यात एक जण आला आणि तुमच्यासाठी रांगा थांबवल्यात , तुम्हाला लगेचच आत बोलावलंय असं त्याने सांगितलं. मला वाटलं आरती वगैरे काही होईल पण नाही ते माऊली आले माझ्यासमोर बसले आणि स्टोरी ऐकवा म्हणून सांगितले. कैलास वाणी आणि आप्पा दोघेही माझ्याकडेच बघत होते. आप्पा म्हणाले ‘करा सुरू’. विश्वास ठेवा तुम्ही देऊळ बंद चित्रपट पाहिलाय मला या स्टोरीबद्दल काहीही माहीत नव्हतं. मी माझीच गोष्ट त्या सगळ्यांना सांगायला सुरुवात केली. ‘एक शास्त्रज्ञ असतो, तो असतो नास्तिक, त्यांना तुमचे स्वामी काय आवडत नसतात. तुमचे म्हटल्यानंतर माझ्या लक्षात आलं आणि मी आपले स्वामी असं म्हटलो. विश्वास ठेवा मला माहित नाही काय झालं, जे सिनेमात दाखवलं तेच मी त्यांना सांगायला सुरुवात केली. मला कळलंच नाही हे कसं सुचलं कदाचित मी खूप एकांकिका केल्या होत्या मी बोलत गेलो, ते सुचत गेल. मी थांबलो तेव्हा माउलींनी मला एक प्रश्न केला की, ‘तुम्ही खरंच देव मानता?’ मी मानतो असं नाही पण माझे आईवडील वारकरी आहेत. वारीला जातात, घरात सकाळ संध्याकाळ पूजा असते.त्यावर ते पुन्हा प्रश्नार्थक म्हणाले ‘तुम्ही मानता?’. आपल्याला आता पकडलं असं समजून प्रवीण तरडे यांनी कबुली दिली की, ‘नाही मी नाही मानत एवढं देवाला’. तेव्हा त्यांनी प्रश्न केला की, ‘खरं सांगा ही गोष्ट आता सुचली का आधी?’ आता माउलींना मनातलं सगळं कळत असेल या विचाराने मी ‘ हो मला गाडीत उलटीचा त्रास होतो मग विचार करायला वेळ नाही मिळाला इथे आल्यावर मला सुचली’ असे उत्तर दिले. माऊली हसले आणि उठून म्हणाले की, ‘वाटेल ते बजेट द्या , डॉक्युमेंटरी नाही मला ह्याच्यावर सिनेमा करायचाय’. आणि मग स्टोरी बनत गेली तसा तो सिनेमा बनत गेला. आणि हा चित्रपट लोकांनी डोक्यावर घेतला.”

देवाला काळजी...🌹

जशी भक्ताला आपल्या भविष्याची काळजी आहे तशीच देवालाही भक्ताची काळजी आहे.

जो भगवंत स्वतः भाविकांचे भविष्य लिहीतो, त्यांच्या प्रारब्धाचे मोजमाप करतो, त्या अनुषंगाने त्यांना यथोचित फळ देतो, थोडक्यात ज्याच्या हातात सर्व काही आहे, त्यालाच आपली काळजी आहे ही कल्पनाच मुळी किती निरागस आहे. दत्त महाराजांच्या बाबतीत तर हे अगदी तंतोतंत लागू होते. खरोखरच आपण एखादे देवकार्य हाती घेतल्या पासून ते कार्य सुरळीत पार पडे पर्यंत महाराजांची आपल्यासाठीची काळजी प्रत्येक अनुभूतींवरून लक्षात येईलच. मग ते तीर्थक्षेत्री जाण्यासाठी लागणारे तिकीट असो किंवा मंदिरात लांबलचक रांग असूनही झालेले अविस्मरणीय दर्शन असो. दत्त महाराजांची कळकळ भावविभोर करते.

🌹श्री गुरुदेव दत्त | श्री गुरू स्वामी समर्थ🌹