🌹नित्य स्वामी दर्शन 🌹आज शुक्रवार 🌹 श्रीमहालक्ष्मीची प्रार्थना 🌹 श्रीलक्ष्मीव्यंकटेशाची प्रार्थना 🌹 श्री गुरुदेव दत्त | श्री गुरू स्वामी समर्थ🌹

🌹 नित्य स्वामी दर्शन 🌹आज शुक्रवार 🌹 श्रीमहालक्ष्मीची प्रार्थना 🌹 श्रीलक्ष्मीव्यंकटेशाची प्रार्थना 🌹 श्री गुरुदेव दत्त | श्री गुरू स्वामी समर्थ🌹

ॐ स्वामी समर्थ हे परब्रह्माचे मूर्त रूप आहे. श्रीदत्तावतारी स्वामी समर्थ हे उत्पत्ती, स्थिती आणि लय ह्याचे प्रतीक आहे. प्रापंचिक दुःखातून सुटका करून घ्यायची असेल तर स्वामी समर्थांची अखंड नामसाधना आवश्यक आहे. आपण जोपर्यंत अनासक्त वृत्तीने कर्मे करीत नाही तोपर्यंत स्वामींची नामसाधना मूर्त रूपात प्रकटच होत नाही. आपण आपली प्राप्त कर्तव्ये नीटपणे पार पाडत स्वामींचे अखंड नाम घेतलेत तर साधनेला निश्चित सुरुवात होते. सत्याची प्रतिष्ठापना हृदयात करून, आदर्श जीवनमूल्याचा स्वीकार केलात तर स्वामीदर्शन झाल्याशिवाय राहणार नाही. प्रपंच जरूर करावा. परंतु करीत असलेल्या प्रपंचाला परमार्थाची यशस्वी जोड द्यावी. परोपकारातच जीव रमवावा. एवढे केलेत की आयुष्याची अर्धी लढाई आपोआप जिंकली जाते. स्वामींची प्राप्ती व्हावी असे वाटत असेल तर स्वत:ला विहित कर्मापासून वेगळे करून चालत नाही. चित्त निर्मळ करून प्राप्त कर्तव्ये पार करीत स्वामीनाम घेतले तर दर्शनयोग आयुष्यात निश्चितपणे निदान एकदा तरी उगवतो. त्यासाठी एक करावे. स्वामी सर्वत्र आकाशासारखे पसरलेले आहेत ह्या सत्याची प्रचीती घ्यावी. सर्व वस्तुमात्रात स्वामी गच्च भरलेले आहेत, त्यांचा वास सर्वत्र आहे, किंबहुना त्या विश्वाचे स्वामीच मालक आहेत हे लक्षात ठेवून आपण आपले प्रत्येक कर्म करावे. ह्या विश्वातल्या कुठल्याच वस्तूवर आपला मालकी हक्क नाही ह्या सत्याची जाणीव एकदा का झाली की स्वामींचे अस्तित्व ब्रह्मांडव्यापी आहे ह्याची खात्री पटते. आपल्याला प्रत्येक गोष्ट पूर्व प्रारब्धानुसार मिळते हे लक्षात ठेवावे, म्हणजे सुखदुःखांचा वारा अंगावर आल्यावरसुद्धा आपण त्यापासून अलिप्त होऊ. कुठल्याही गोष्टीविषयी मग आसक्ती वाटणार नाही. एक लक्षात घ्या की स्वामीतत्त्व सर्वत्र नांदते आहे. आपल्याला त्या तत्त्वाला गाढ आलिंगन द्यायचे आहे हे लक्षात ठेवून स्वामीजपात तल्लीन व्हायचे. आपल्या हातून केवळ सत्कर्मेच घडतील ह्याची आपण काळजी घ्यायची. माझ्या प्राणप्रिय स्वामीभक्तांनो, माझे तुम्हाला एकच सांगणे आहे की कुठल्याही परिस्थितीत नामस्मरणाला विसरू नका. स्वामी तुमची काळजी घेतल्याशिवाय राहणार नाहीत.....

॥ अवधूत चिंतन श्री गुरुदेव दत्त ॥  ॥ श्री स्वामी समर्थ माऊली ॥

🌹श्री गुरुदेव दत्त | श्री गुरू स्वामी समर्थ🌹

 

 

 

 

 

 

 

 

 

 

 

 

 

 

 

 

 

 

 

  🌹श्रीलक्ष्मीव्यंकटेशाची प्रार्थना 🌹

श्रीवैकुंठेश्वर सप्तगिरीवासी।
हृदयी लक्ष्मी अर्धांगिनी ज्यासी।
दशावतार घेऊनि भक्तां तारियेला।
शरण मी त्या लक्ष्मीव्यंकटेशाला।।१।।
रामावतारी वेदवतीस वर दिधला।
पद्मावती रूपात वरिले तिला।
सीतेच्या छायेस ज्याने उद्धरिला।
शरण मी त्या लक्ष्मीव्यंकटेशाला।।२।।
जगन्नाथपुरीस वास सदैव ज्याचा।
भगिनी बंधू सोबत जिथे शोभला।
सुभद्रा, बलभद्र यांचे सवे रमला।
शरण मी त्या लक्ष्मीव्यंकटेशाला।।३।।
अंबरिषाचे सत्त्व दुर्वास पाही।
साधन द्वादशीला त्यास शाप देई।
प्रकट होऊनि त्याचा शाप स्वये घेतला।
शरण मी त्या लक्ष्मीव्यंकटेशाला।।४।।
वृंदावनी राधेसवे रासक्रीडा करी।
अजुनी अनुभूती भक्तांसी साक्षात्कारी।
गोप गोपिकांसाठी मनमोहन झाला।
शरण मी त्या लक्ष्मीव्यंकटेशाला।।५।।
विष्णुसहस्रनामात वास्तव्य प्रत्यक्ष असे।
भीष्म महामुनीने जे कथीले असे।
पार्थास कुरुक्षेत्री गितोपदेश केला।
शरण मी त्या लक्ष्मीव्यंकटेशाला।।६।।
स्थिती तत्त्वाचा तू अधिकारी।
सर्वभूतांचे पालनपोषण करी।
शंख, चक्र, गदा, पद्म शोभे जयाला।
शरण मी त्या लक्ष्मीव्यंकटेशाला।।७।।
कलियुग हे अति कठीण जाहले।
अदृश्य शक्तीने विश्वास ग्रासले।
त्या कंसासी मर्दाया पुन:अवतरी गोकुळाला।
शरण मी त्या लक्ष्मीव्यंकटेशाला।।८।।
पेंद्या, वाकड्या परी आम्ही सवंगडी तुझे।
तुझ्याच लीलेत हे विश्व चालले असे।
साष्टांग दंडवत हे प्रभो तुजला।
शरण मी त्या लक्ष्मीव्यंकटेशाला।।९।।
श्रीगुरुदेव दत्त.

 

आज शुक्रवार.... 

🌹 श्रीमहालक्ष्मीची प्रार्थना 🌹

नेसोनी पितांबर वस्त्र भरजरीचे।
स्वर्णालंकार ते नाना परीचे।
उभी ती त्या करवीर नगरी।
जगज्जननी महालक्ष्मी त्रिपुरसुंदरी।।१।।
जवळ ज्योतीबाचा डोंगर।
जो आईचा क्षेत्रपाल खरोखर।
प्रत्यक्ष शिव जे उग्र रूप धरी।
जगज्जननी महालक्ष्मी त्रिपुरसुंदरी।।२।।
पंचगंगेचा तो रम्य तीर।
आईचे चरण धुते जिचे नीर।
नाना दैवते राहती जिच्या मंदिरी।
जगज्जननी महालक्ष्मी त्रिपुरसुंदरी।।३।।
व्यंकटेशाने पद्मावतीस वरिले।
रुसुनी त्यावरी तू कोल्हापुरी ठाण मांडिले।
कोल्हासुरास मर्दुनी रक्षिली करवीरनगरी।
जगज्जननी महालक्ष्मी त्रिपुरसुंदरी।।४।।
ब्रह्मा, विष्णू, महेशाची तू आदिशक्ती।
तूच प्रकटली सप्तशृंगी होऊनि वणीची आई।
सप्तशतीत प्रकटली, होऊनि मार्कंडेयाची माऊली।
जगज्जननी महालक्ष्मी त्रिपुरसुंदरी।।५।।
महाकाली होऊनि मधू कैटभास ग्रासले।
होऊनि महासरस्वती शुंभ निशुंभास मर्दिले।
निर्दाळुनी महिषासुर,संपविली शक्ती असुरी।
जगज्जननी महालक्ष्मी त्रिपुरसुंदरी।।६।।
शरणागत तुज आम्ही दीन आणि कष्टी।
नको दूर लोटू, करी कृपेची दृष्टी।
लोटांगण तव चरणी, दे ठाव अंतरी।
जगज्जननी महालक्ष्मी त्रिपुरसुंदरी।।७।।

॥ अवधूत चिंतन श्री गुरुदेव दत्त ॥  ॥ श्री स्वामी समर्थ माऊली ॥

🌹श्री गुरुदेव दत्त | श्री गुरू स्वामी समर्थ🌹